പുനർജന്മമില്ലാത്ത ഓർമ്മകൾ

കൊഴിഞ്ഞു പോയ നിറമുള്ള പൂക്കളൊന്നും
പുഷ്പിച്ചു വീണ്ടുമീ വഴിത്താരയിൽ
എത്തില്ലെന്നറിയാം
പറയാൻ മറന്നു പോയ വാക്കുകളൊന്നും
സ്വന പേടകം തേടി രണ്ടാം വരവിനു ശ്രമിക്കുകയുമില്ല വാരിപുണരാൻ മറന്ന നിന്റെ തണുത്ത കൈകളെന്നെ പുണരാൻ വീണ്ടും കാറ്റിനെ പോലെ പതുങ്ങിവരില്ലെന്നുമറിയാം
നെഞ്ചിലെരിഞ്ഞ കനൽ പങ്കു വെയ്ക്കാൻ എന്റെ ഇട നെഞ്ചിൽ തല ചായ്ക്കാൻ മറന്ന നീ നെഞ്ചിലെ ചൂട് ചോദിച്ചു ഇനി വരില്ലെന്നറിയാം
നിറഞ്ഞൊഴുകിയ കണ്ണ് തുടക്കാൻ എന്റെ വിരലുകളെ അനുവദിക്കാത്ത
നീയിനി കണ്ണ് നിറച്ചെന്റെ മുന്നിൽവരില്ലെന്നുമറിയാം
ഓർമ്മകൾ പുനർജന്മമില്ലാത്തവയാവട്ടെ
ശവമടക്ക് കഴിയുമ്പോൾ
ഒരു വിരുന്നു വരവിനു ശ്രമിക്കാതിരിക്കട്ടെ .........